Ingi Samuelsen
Føroyar og ES skrivaðu mikudagin undir avtalu um sínámillum fiskiveiðirættindi fyri 2019. Avtalan er ikki nógv broytt í mun til avtaluna fyri 2018, men nakrar broytingar eru framdar, skrivar heimasíðan hjá Fiskimálaráðnum.
Atgongdin hjá føroyskum skipum at fiska svartkjaft í ES sjógvi hækkar við 1.000 tonsum til 22.500 tons, umframt at Føroyar varðveita kvotuna av svartkjafti á 10.000 tons. Føroysk skip hava sostatt møguleika at fiska 32.500 tons av svartkjafti í ES sjógvi í 2019.
Atgongdin at fiska norðhavssild í sjóøkinum hjá hvørjum øðrum verður hækkað við 500 tonsum, soleiðis at partarnir kunnu fiska 4.500 tons av norðhavssild hjá hvørjum øðrum.
Sínámillum atgongdin at fiska makrel í økinum hvør hjá øðrum verður 24.690 tons. Hetta er sama lutfall av føroysku heildarkvotuni sum undanfarin ár.
Viðvíkjandi øðrum fiskasløgum so vóru gjørdar ymiskar tillagingar í kvotunum, sum føroysk skip hava at fiska í ES sjógvi, og ES skip hava at fiska í føroyskum sjógvi.
Vinarliga broyt tínar kennifíla - og privatlívsstillingar fyri at síggja hetta innihald