Bolivia: Forsetin fer at útskriva nýval

Forsetin í Bolivia, Evo Morales, ætlar at skriva út nýval og at skifta valmyndugleikarnir í landinum út.

Hesum boðar hann frá í dag sambært JyllandsPosten.

Evo Morales hevur verið undir stórum trýsti, síðan boðað var frá, at hann vann seinasta valið í Bolivia 20. oktober.

Síðan tá hava stór mótmæli verið í landinum, har mótmælisfólkini hava kravt nýval, tí tey eru sannførd um, at talan hevur verið um valsvik. Eitt nú var ein steðgur á 24 tímar mitt í teljingini av atkvøðum, og ógreitt er, hvat orsøkin var til hetta.

Sambært frágreiðing frá Organization of American States (OAS), er niðurstøðan hjá felagsskapinum eisini, at talan var um "greiða manipulatión" í sambandi við valið, og verður mælt til, at skipa fyri nývali.

Trý fólk hava higartil latið lív í ófriðinum í Bolivia.