Danskar ljósmøður komnar at arbeiða á Landssjúkrahúsinum

Klokkan trý í gjár herdi Ljósmøðrafelagið verkfallið og tóku øll undantøk aftur.

Men samstundis lendu tvær danskar ljósmøður á flogvøllinum í Vágum, tær eru síðani farnar til arbeiðis á Landssjúkrahúsinum.

Forkvinnan í Ljósmøðrafelagnum, Annika Hoydal, harmast um hetta.

"Vit mugu bara staðfesta, at ein vikarstova í Danmark ikki virðir verkfalsrættin hjá okkum, og hevur funnið tvær ljósmøður, sum ikki eru í nøkrum fakfelag, at koma til Føroya at arbeiða," sigur hon sambært KVF.

Ljósmøðrafelagið hevur, sambært Anniku Hoydal, fingið stuðul bæði frá danska ljósmøðrafelagnum og øðrum norðurlendskum ljósmøðrafeløgum undir verkfallinum.