Demokratar hava vunnið Senatið – Umboðsmannatingið ikki avgjørt enn

Í USA hava demokratarnir tryggjað sær meirilutan í Senatinum komandi tvey árini eftir miðskeiðisvalið týsdagin.

Tað gjørdist greitt í nátt, tá demokratarnir tryggjaðu sær 50 av teimum 100 sessunum í Senatinum, meðan republikanski flokkurin hevur tryggjað sær 49.

Enn er ógreitt, hvør fær tann síðsta sessin hjá statinum Georgia, har umval má haldast orsakað av einari serligari vallóg í statinum, men longu nú er greitt, at demokratar í roynd og veru hava meirilutan.

Hóast republikanarar skuldu vunnið síðsta sessin, og báðir flokkar fáa 50 umboð, verður tað varaforsetin, demokraturin Kamala Harris, sum fær avgerandi atkvøðuna, tá tað stendur á jøvnum, og tí kann mann tosa um ein demokratiskan meiriluta. Núverandi Senatið, sum verður sitandi fram til 3. januar, er eisini býtt helvt um helvt.

Hvussu verður við Umboðsmannatinginum, har 435 umboð skulu veljast, er enn ikki greitt, tí atkvøðurnar verða enn taldar. Í løtuni sær tú út til, at republikanarar fáa meirilutan.

Fyri at fáa meiriluta krevst 218 umboð, og sambært CNN hava republikanarar í løtuni tryggjað sær 216 umboð, meðan demokrater hava 204.