Dótturfelag hjá SEV vann útboðið um vindmyllulund í Suðuroy

Orka á Umhvørvisstovuni hevur í dag tikið avgerð um at veita Vindfelagnum Neshaga, sum er dótturfelag hjá SEV, loyvi til elframleiðslu úr vindorku við sjey vindmyllum í Porkeri. Tað skrivar Umhvørvisstovan á heimasíðu sína.

Tá freistin at søkja var úti 1. mars kl. 12, vóru tvey boð komin inn - frá Vindfelagnum Neshaga og frá hollendska vindmylluframleiðaranum EWT.

EWT hevur bjóðað við felag undir stovnan, og boðið frá teimum er treytað av, at til ber at fáa føroyskar íleggjarar at luttaka í verkætlanini.  EWT hevur seinni boðað frá, at tað ikki er eydnast at finna føroyskar íleggjarar til verkætlanina.

Vindfelagið Neshagi hevði lægsta boðið.

Boðið frá Vindfelagnum Neshaga er áljóðandi 31,55 oyru/kWt, ið merkir at vindfelagið fær hendan prísin fyri framleiðsluna, ið verður latin inn á elnetið hjá SEV.

Boðið frá EWT var 34 oyru/kWt.

Eitt av endamálunum við elveitingarlógini er at tryggja, at elveitingin í Føroyum verður løgd til rættis við fyriliti fyri veitingartrygd, samfelagsbúskapi og umhvørvi, eins og at tryggja, at streymprísurin ikki verður hægri enn neyðugt.

Eisini skulu atlit takast til, at møguleiki skal verða fyri fleiri elframleiðarum, fyrst og fremst á vindorkuøkinum.

Við hesum útboðnum hevur Umhvørvisstovan tryggjað møguleikan hjá øðrum framleiðarum at bjóða seg fram, samstundis sum fyrilit eru tikin fyri m.a. prísi og veitingartrygd.

Við hesi avgerð verða møguleikar at flyta Suðuroynna munandi longur fram á leið, tá ið ræður um at framleiða “grøna” og lutfalsliga bíliga elorku.

Útbygging av vindorku innan eløkið skal framhaldandi mennast, og sum kunnugt er útboð lýst á Eiði og eisini er umsókn móttikin um loyvi til elframleiðslu í Hoyvíkshaganum. Hetta loyvið verður boðið út í hesum døgum.