Eggjarænarar avdúkaðir

Í gjár varð løgreglan send út á eina uppgávu, sum tey ikki fáa vanliga.

Tað var ein festari í Gásadali, sum boðaði frá, at tveir mans vóru farnir upp í bergið í Gásadali at ræna havhestaegg.

Festarin sá sjálvur eggjarænararnar frá upsini har hann sjálvur var staddur. Menninir vóru farnir við báti undir bergið, og síðan upp í røkurnar at ræna.

Festarin vísti løgregluni á, at tað er hann, sum hevur rættindini til eggini í bjørgunum, og at ongin hevði biðið hann um loyvi at sleppa í bergið eftir eggum.

Løgreglan vísir á, at helst lá vantandi vitan um evnið aftan fyri hesa hendingina. Tað eydnaðist løgregluni at koma í samband við menninar og tosa við teir um viðurskiftini.

- Vit fingu eitt gevandi tos við menninar, og fingu greitt teimum frá, at ein og hvør ikki kann fara upp í røkurnar eftir eggum, men at slíkt krevur loyvi frá festaranum ella eigaranum av berginum, greiðir vakthavandi á politistøðini frá.

Málið endaði við, at skipað varð so fyri, at menninir og festarin tosaðu saman, og samdust um, hvussu málið skuldi loysast. Menninir høvdu fingið um 30 havhestaegg.