Ein koyrdi 141 km/t – tríggir aðrir fingu klipp

Løgreglan gjørdi ferðamátingar í Norðskálatunlinum í nátt millum klokkan 01.30 og 03.00, og hon fekk nokk at gera. Fýra bilførarar vórðu steðgaðir fyri brot á ferðslulógina.

Størsta brotið framdi ein bilførari, sum koyrdi 141 km/t. Hetta merkti, at hann fekk treytaleysa frádøming og misti koyrikortið á staðnum. Hesin bilførarin varð tí noyddur at lata bilin standa og finna annan hátt á koma heim, sigur vaktleiðarin á løgreglustøðini.

Tríggir aðrir bilførarar vórðu eisini tiknir. Tveir teirra koyrdu 109 km/t, meðan tann triði koyrdi 105 km/t. Hesir fingu allir klipp í koyrikortið.