Eingin avgerð verður tikin fyrrenn í august mánað

Eftir ætlan skuldi avgerð takast í málinum um tíðindaleiðarastarvið í KVF fríggjadagin. Avgerð skuldi takast um kæruna hjá Liljan Weihe, men nú verður eingin avgerð tikin fyrrenn í august.

Orsøkin er, at løgfrøðingurin, sum sat við málinum er fluttur í annað starv, og tí skal nýggjur løgfrøðingur setast inn í málið. Hesin løgfrøðingur byrjar ikki í starvinum fyrrenn eftir summarfrítíðina.

Kári Sólstein, virkandi kringvarpsstjóri, sigur við Norðlýsið, at hann fer ikki at søkja eftir nýggjum tíðindaleiðara, fyrrenn løgfrøðiliga metingin í Mentamálaráðnum fyriliggur. Hetta hóast at Mentamálaráðið hevur gjørt greitt, at kringvarpsstjórin hevur rætt at søkja eftir nýggjum tíðindaleiðara, hóast kæran hjá Liljan Weihe ikki enn er liðugt viðgjørd.