Eitt skinn í part

Tað verður eitt skinn í part til tey 192 fólkini, sum vóru skrivaði upp til grindina í Bø í kvøld, upplýsir Finnbogi Midjord, sýslumaður, í kvøld.

Grindin taldi 45 hvalir, og eftir at tað fasta var farið av, vóru 195 skinn eftir at býta til tey 192 fólkini, sum tóku lut í drápinum. Sostatt er eitt skinn í part.

Eitt skinn er 50 kilo av tvøsti og 25 kilo av spiki. 

Sum vit skrivaðu fyrr í kvøld, koma seðlarnir út klokkan 7 í morgin á bryggjuni í Sørvági.