Eldurin kyknaði í køkinum

Tað var seinnapartin í gjár, at eldur kom í eini sethús í Hovi. Løgreglan hevur í dag verið og gjørt kanningar, og orsøkin til eldin er nú funnin.

Eldurin kyknaði í køkinum, sigur løgreglan, sambært in.fo

Eigarin av húsunum, ið var einsamallur inni, hevði sett eina grýtu á komfýrin, men hevði síðani gloymt plátuna. Tí festi tað fyrst í grýtuna, og síðani fór eldurin upp í roykhettuna, og skjótt breiddist hann um alt húsið.

Eigarin slapp úr húsunum í øllum góðum.

Talan var um ógvusligan eld, og tað tók sløkkiliðnum fleiri tímar at sløkkja hann. Húsini eru nú so illa farin, at tey eru klár at ríva niður.