Fara undir at endurstovna Sjálvstýri seinni í mánaðinum

8. desember 2022 noyddist Sjálvstýri at ásanna, at tað ikki eydnaðist at koma um tinggáttina. Tað eru 80 ár síðani at hetta hendi seinast, og valkvøldið staðfesti formaðurin Sámal Petur í Grund, at í fyrstu syftu fór flokkurin at vera virkin politiskt uttanfyri tingið.

- So fara vit at taka støðu til, hvussu vit gera til løgtingsval og onnur val í framtíðini, segði hann við Portalin.

Les eisini: Sjálvstýri heldur fram uttanfyri løgtingið

Gott eina viku eftir valið kom eitt skriv frá Sjálvstýrinum, har tað millum annað varð víst til ætlanir landspolitiskt og komunalt.

- So skjótt sum úrslitið av valinum gjørdist greitt, sást ein stríðsandi vakna í bæði valevnum, samskiparum og øðrum, ið standa flokkinum nær. Øll eru samd um, at vit nú skulu undir at endurreisa og endurnýggja flokkin.

Eftir fund í landsnevndini og eftir "aftursvarið" aftaná valið, var greitt, at flokkurin fór at stríðast miðvíst víðari, og á aðalfundinum hjá Norðoya Sjálvstýrisfelag, sum verður týskvøldið 21. februar, verður farið undir at samla inn undirskriftir til endurstovnan av flokkinum.

Hesum boðar Norðoya Sjálvstýrisfelag frá í tíðindaskrivi, ið varð sent miðlunum í gjárkvøldið.

Les eisini: Sjálvstýri skal endurreisast og endurnýggjast

Har stendur eisini, at Sámal Petur í Grund á fundinum í "gomlu Cafe Fríðu" í Nólsoyar Pálsgøtu 7 fer at siga frá søguni hjá Sjálvstýri.

- Á fundinum fáa fólk eisini møguleika at vera við til at endurstovna flokkin, soleiðis at Sjálvstýri kann stilla uppaftur til komandi løgtingsval. 

Minst 800 undirskriftir skulu til fyri at ein flokkur, sum ikki er á tingi, skal sleppa at stilla upp. Aðalfundur Norðoya Sjálvstýrisfelags verður  í Klaskvík, týskvøldið, 21. februar klokkan 20.