Floghavnin í Kabul latin uppaftur fyri innlendis flogferðslu og neyðhjálp

Nú er innlendisflúgvingin millum afghanska høvuðsstaðin Kabul og tríggir av størstu býunum í Afghanistan tikin uppaftur umvegis floghavnina í Kabul.

Ariana Afghan Airlines skrivar í fráboðan, at flogfelagið tók flúgvingina uppaftur leygardagin, skrivar Ritzau.

Katar sendi fyrr í vikuni eitt lið av teknikarum til floghavnina í Kabul fyri m.a. at gera flogbreytina í stand aftur, so flúgvingin kundi takast uppaftur.

Hetta merkir, at flogfør við neyðhjálp aftur kunnu lenda í Kabul, sigur sendiharrin hjá Katar í Afghanistan við al-Jazeera.

Floghavnin í Kabul hevur annars verið stongd, síðan USA og hini sameindu londini fluttu tey seinastu fólkini úr Afghanistan 31. august.

Hóast tíggjutúsundatals afghanar vórðu flutt av landinum, sita fleiri túsund enn eftir, sum hava ferðaloyvi men sum ikki náddu at koma til floghavnina. Tey sleppa tó trygt av landinum, hevur Taliban lovað.