Fólk í Klaksvík kunnu fara til hús aftur

Í gjár vóru nøkur skriðulop á vestaru síðu í Klaksvík orsakað av nógva avfallinum, ið kom eftir nógva kavan, sum hevði ligið í nakrar dagar. Lopini raktu nøkur hús og serliga eitt øki hart.

Tíbetur var eingin fólkaskaði, men um døgurðatíð valdi átaksleiðarin, í samráð við fleiri onnur, at tað var best at heita fólk um at fara frá húsum beinanvegin, tí vandi var fyri fleiri skriðulopum. Talan var um fólk, sum búgva á ovastu vegunum í Klaksvík, Ánunum og á Norðoyri.

Les eisini: 
Undantaksstøða Undir Brúnni í Klaksvik
Heita á fólk um at fara frá húsum

Hetta var ein umfatandi evakuvering, ið løgreglan eisini hjálpti við seinnapartin. Omanfyri nevna økið fevnir um ógvuliga nógv fólk, sum seinnapartin og í gjárkvøldið hildu til hjá familju ella vinfólki aðrastaðni. Ítróttahallirnar og seinni KFUM vórðu eisini sett fram sum tilhaldsstøð.

Í gjárkvøldið varð tað ikki mett at vera ráðiligt, at fólk fóru til hús aftur. Hetta tí at nógv avfall stóð til at koma niður seint í gjárkvøldið, og at vandin ikki var av.


Fyrra stóra skriðan (Mynd: Eyðbjørn Jacobsen)

Tað sá einki serligt út Undir Brúnni í gjár

Tað er tó eingin skriða lopin í Klaksvík í útvið eitt samdøgur, og fyri lítlari løtu síðani skrivaði Klaksvíkar kommuna á heimasíðu sínari, at fólk kunnu fara aftur til hús.

- Átaksleiðslan hevur í morgun umrøtt støðuna, við m.a. veðurkønum og Jarðfeingi, og mett verður, at tað er ráðiligt hjá fólki at fara aftur til hús

Sí eisini: 
Video: Her loypur skriða í Klaksvík
Fleiri myndir av skriðuni í Klaksvik