Fyrilestur og politiskt pallborðskjak um kannabis mikukvøldið

Smæran verður mikukvøldið klokkan 19 karmur um tiltak um fyrilestur og pallborðskjak um medisinskt kannabis og kannabis sum heilivág.

Umboð fyri felagið Cannabis Danmark kemur at fortelja, hvat støðan er við donsku royndunum á kannabis-økinum. Aftaná er pallborðskjak við læknum, fakfólkum, ið hava við kannabis at gera, og politikarum.

Tað verður Bárður Persson, sum verður orðstýrari til pallborðskjakið har nærum allir politiskir flokkar luttaka.

Teir flokkar, sum hava boðað frá eru Bill Justinussen fyri Miðflokkin, Bjarni Kárason Petersen fyri Framsókn, Elsebeth Mercedes Gunnlaugsdóttir fyri Fólkaflokkin, Gunnvá Tróndardóttir Joensen fyri Javnaðarflokkin, Katrin Kallsberg fyri Tjóðveldi og Arnfinn Á Birtuni fyri Framtakið.

Enn er óvist hvør luttekur fyri Sjálvstýri og Sambandsflokkin.

Tað er "Framtakið fyri rættinum at velja kannabis", sum skipar fyri tiltakinum, sum er ókeypis.

Tiltakið verður eisini stroymt á Portalinum, og verður at finna á forsíðuni áðrenn klokkan 19.