Innanlands

Grøna orkan setti met í oktober

Nógva regnið og vindurin í oktober í ár mundi vera summum til ampa, men tá tað ræður um elorku, er regn og vindur kærkomið

Savnsmynd

Savnsmynd

2018-11-20 12:08 Author image
Alda Nielsdóttir

Elorkan í Føroyum royndist sera væl í oktober. Sonevndi grøni parturin av samlaðu framleiðsluni var heili 67,8 prosent. Vindorka stóð fyri 23,3 prosentum, meðan 44,5 prosent komu frá vatnorku. Hetta er sera gott samanborið við undanfarin ár. Í oktober 2017 var grøni parturin 64 prosent, og í 2016 var grøni parturin 46 prosent.

Tað skrivar SEV á heimasíðu sína.

Oktober gjørdist eisini besti mánaður nakrantíð við vindorku. Meðal vindmegin var 11,8 m/sek, og vindmyllurnar framleiddu 7.583 MWh, ið svarar til samlaðu elnýtsluna hjá øllum privatum húskjum í Føroyum.

Vindmyllulundin í Húsahaga framleiddi 5031,48 MWh í oktober 2018. Hetta er nýtt met.

Tó er tað ikki bara vindframleiðslan, sum er økt. Virksemið í samfelagnum er nógv vaksið og somuleiðis eisini eftirspurningurin eftir streymi. Samlaða elframleiðslan er 4,5 prosent hægri enn somu tíð í fjør. Hetta merkir, at hóast grøna framleiðslan er hægri enn í 2017, ger stóri vøksturin í nýtsluni, at termiski parturin (olja) eisini er øktur, og er 7,7 prosent hægri enn sama tíðarskeið í 2017, skrivar SEV.

placeholder
placeholder