Hamas-leiðari latið lív í ísraelskum loftálopi

Salah Al-Bardawil, politiskur leiðari í palestinsku Hamas-rørsluni, hevur latið lív í einum ísraelskum loftálopi, boða palestinskir miðlar frá í dag.

Al-Bardawil og kona hansara lótu lív í einum álopi í Khan Younis í sunnara parti av Gazageiranum. Hann var ein kendur limur í politiska vonginum hjá Hamas, sum hevur stillað upp til fleiri miðlasamrøður gjøgnum árini.

Sambært miðlinum Times of Israel er hann triði limurin í politiska vonginum hjá Hamas, sum hevur latið lív í ísraelskum loftálopum, síðan fyrsta stig av vápnahvíldini millum Ísrael og Hamas fór úr gildi.

Tveir aðrir politiskir leiaðrar og fleiri embætisfólk lótu lív í einum álopi týsdagin.