Helst verður Helena nýggj næstforkvinna á tingi

Nú Heðin Mortensen er vorðin landsstýrismaður við Samferðslumálum, skal hann siga seg úr eini røð av øðrum nevndum og álitissessum.

Ein teirra er sum fyrsti næstformaður á Føroya Løgtingi.

Helst verður tað Helena Dam á Neystabø, sum verður nýggj næstforkvinna á tingi.

Sjálv vildi Helena ikki vátta hesum, tá vit tosaðu við hana undir móttøkuni í Tinganesi í morgun.

- Vit hava ein fund í tingbólkinum nú um eina løtu, og so gangi eg út frá, at vit boða løgtingsformanninum hvør verður nýggjur næstformaður vegna flokkin í staðin fyri Heðin Mortensen, segði Helena Dam á Neystabø.

Tað er ikki soleiðis, at tingið skal velja næstformannin. Tað eru flokkarnir eftir stødd, sum útnevna síni umboð í formansskapin hjá løgtinginum.

Heðin Mortensen verður nú eisini noyddur at siga tingsessin frá sær. Í hansara stað kemur Djóni Nolsøe Joensen, sum eisini sat á tingi meðan Henrik Old var landsstýrismaður.

Í Tórshavnar býráð er Bjørg Dam fyrsti eykalimur á listanum hjá Javnaðarflokkinum, og hon fær nú eisini fast sæti í býráðnum, meðan Heðin Mortensen tekur orlov frá býráðsarbeiðinum.

Á løgtingsfundinum í dag er ein long røð av málum – øll viðvíkjandi skatti og avgjøldum -, sum skulu hava fyrstu viðgerð, áðrenn tey verða send víðari í fíggjarnevndina til viðgerðar. 

Djóni Nolsø Joensen (Savnsmynd: Jens Kr. Vang)

Bjørg Dam (Savnsmynd: torshavn.fo)