Hilmar Jan skrivað bók um rituvíkssystkinini

Hilmar Jan Hansen, tíðindamaður, reportari og skemtari úr Runavík hevur skrivað eina bók um stóra systkinaflokkin, ið naddi at gerast so gamal, at tey vórðu upptikin í metbókina hjá Guinness’.

Bókin kallast ”Lív og lagna á Líðini”. Sprotin gevur út, og hóskvøldið verður bókin løgd fram á almennum tiltaki á Eysturoyar Ellis- og Røktarheimi í Runavík.

Heimasíðan hjá Runavíkar kommunu skrivar soleiðis um tiltakið:

Søgan um systkini í Rituvík, sum komu í Guinness-metbókina, er nú skrivað. Hilmar Jan Hansen, tíðindamaður, reportari og so mangt annað, væl kendur í Føroyum og slektaður úr grannabygdini Runavík, hevur skrivað bókina, og Sprotin hjá Jonhardi Mikkelsen í Vestmanna hevur fyrireikað útgávuna og givið bókina út.

Elsebeth og Magnus Olsen, vanliga róptur Magnus í Rituvík, kendur skipari í samtíðini, áttu 12 børn. Í juli mánaði 2012 vóru tey øll uppi á døgum og rundaðu tilsamans tey túsund árini. Hendan stórhending rakk til at verða feld inn í metbókina hjá Guinness’.

Fimm ár seinri – 9. juli 2017 - er høvundurin staddur í Vestmanna. Í kirkjuni har hann leikar á urgu. Hendan sunnumorgunin hittir hann Jaspur Olsen, eitt av systkjunum, ið loysir av sum deknur hendan dagin. Teir koma í prát, og sum Hilmar Jan skrivar í formælinum: ”Hugsi beinanvegin, at hugaligt er at síggja Jaspur aftur í roynda leiklutinum, og hann brosar eitt sindur, tá ið vit hyggja hvør upp á annan, hóast eygnabráið samstundis boðar frá, at hann hevur okkurt meira upp á hjarta enn bara at biðja góðan morgun. So hyggur hann fastliga inn í eyguni á mær, andar inn og letur meg vita, hvat mest av øllum fyllir hansara hug og sinni hesa morgunstund.”

”Vit vóru tólv, men nú eru vit ellivu. Í morgun fekk eg boðini, at Maggi bróðir var farin.” Níggju dagar seinri bórust deyðsboðini av Mary – systrini.

Frammanundan hesum hevði Durita Tausen, dóttir Amy, eitt av systkjunum, sum var gift Svenningi, sála, spurt seg fyri, um Hilmar Jan kanska kundi verið áhugaður í at skriva søguna um systkini á Líðini, systkini við heimsmetinum, - tíbetur tók hann av.