Agnar Prestá
Í kvøld, týskvøldið 20. mai, frá klokkan 19 bjóðar Tórshavnar kommuna borgarum í Hoyvík til kunningarfund um Røktarheimið á Stórubrekku.
Talan er um størstu røktarheimsverkætlanina higartil í landinum.
- Talan verður um eitt stórt heim við fleiri minni, samanbygdum húsum í ymsum hæddum og rætningum. Heimið fevnir um 64 búpláss og dagtilboð til 50 eldri heimabúgvandi. Harumframt verða 16 røktaríbúðir til einstaklingar og pør, ið verða tær fyrstu av sínum slag her í landinum. Røktarheimið við Stórubrekku verður sostatt eisini størsta røktarheim í kommununi.
Sí eisini: Skulu byggja nýtt røktarheim fyri yvir 300 milliónir krónur
Í kvøld fara umboð fyri Tórshavnar kommunu at yvirskipað greiða frá um Røktarheimið á Stórubrekku, sum eftir ætlan skal standa liðugt seint í 2027.
Síðani leggur heildarráðgevin, EYA, fram verkætlanina, Høvuðsarbeiðstakarin, Articon, leggur fram byggiarbeiðið, áðrenn møguleiki verður at seta spurningar til endans.
Fyrst í apríl skrivaðu Articon og Tórshavnar kommuna undir arbeiðstøkusáttmála á 296.270.627,00 kr. u/mvg. Hetta merkir at savnaði kostnaðurin við øllum fer nakað uppum 300 milliónir krónur.
Vinarliga broyt tínar kennifíla - og privatlívsstillingar fyri at síggja hetta innihald