Landstýriskvinnan vitjaði á Heilsuskúlanum

Landstýriskvinnan við menta- og skúlamálum, Hanna Jensen, vitjaði í gjár Heilsuskúla Føroya.

Við sær hevði hon aðalstjóran, Poul Gert Hansen Hansen, umframt onnur starvsfólk í Mentamálaráðnum. Landstýriskvinnan nýtti høvið at práta við nakrar av næmingunum, sum hon hitti.

Næmingarnir vóru allir á einum máli um, at teir eru sera glaðir fyri at vera í Suðuroynni og nema sær útbúgving. Eisini onkur næmingur, sum ikki hevði hug at fara til Suðuroynna í skúla, hevði púra broytt hugburð. Tað bleiv sagt, at tað ber væl til fíggjarliga.

Møguleikar sum fjarundirvísing ein dag um vikuna og avriksflutningur í almennu lærugreinunum, ger tað møguligt, at nakrir næmingar eru í skúla 3-4 dagar um vikuna í tríggjar mánaðir, sum hvørt skúlaskeið er. Næmingar eru glaðir fyri møgugleikan, men vilja tó ikki hava ov nógva fjarundirvísing; teir vilja heldur koma suður í skúla!

Tað er nógv ymiskt á skránni á útbúgvingarøkinum í løtuni og tí er umráðandi við tøttum samstarvi millum Mentamálaráðið og Heilsuskúlan. M.a. varð tosað um nýggju útbúgvingina “námsfrøðihjálparar”. Málið um førleikameting í samband við drúgvar arbeiðsroyndir, bleiv viðgjørt, eins og góðkenning av útbúgvingini í Norðanlondum.

Nógv virksemi var á Heilsuskúlanum í dag. Í løtuni eru tríggir flokkar inni í skúlapartinum, tveir heilsuhjálparaflokkur og ein heilsurøktaraflokkur. Nøkur eru ávegis í starvsvenjing og onnur just byrjað í útbúgvingini. Aðrir flokkar eru ávegis inn á skúlan úr starvsvenjing.

Tað eru umleið 50-60 næmingar, sum nema sær prógv hvørt ár á Heilsuskúlanum. Júst nú eru fýra flokkar í holt við eina útbúgving. Umframt alt næmingarvirksemi í dag, var ein lærari í holt við praktiska partin av pedagogikum. Eisini hevur Heilsuskúlin ein praktikant frá donskum skúla fyri “psykomotorisk proffesiónsútbúgving”, sum bæði undirvísir, veitir ráðgeving og venjingar.

Tíðindaskriv frá Heilsuskúla Føroya