Meiriluti fyri at loyva bryggjaríum at selja sterkari

Meiriluti er fyri uppskotinum hjá Magna Laksafoss at loyva bryggjaríunum eisini at selja síni sterku ølsløg í sínum útsølum.

Løgtingið hevur júst atkvøtt í málinum eftir eina viðgerð, sum var rættiliga nógv drúgvari, enn vanligt er fyri aðru viðgerðir.

Andstøðutinglimir brúktu nógva tíð upp á at grundgeva fyri, at her er talan um at gera atgeingið til rúsdrekka nógv størri, og at hetta tí er í stríð við føroysku rúsdrekkalóggávuna annars.

Upprunaliga mælti Magni Laksafoss til, at bryggjaríini skuldu kunna selja alla sína framleiðslu í egnum sølubúðum, og sostatt eisini brennivín.

Men hetta vann ikki frama í vinnunevndini, sum har samgongulimirnir gjørdu eitt broytingaruppskot, so at hetta bert er galdandi fyri øl, tó uttan hámark í styrki.

Tá atkvøtt var um broytingaruppskotið atkvøddu 13 tinglimir fyri og 8 ímóti. Samlað varð málið samtykt við 12 fyri og 9 ímóti.

Málið skal hava eina viðgerð afturat.

Fyrr í dag segði Jacob Vestergaard við portal.fo, at hetta málið er ein partur í avtaluni, sum samgongan hevur gjørt við Magna Laksafoss fyri at hann skal atkvøða fyri fíggjarlógini tá hon kemur til atkvøðugreiðslu, væntandi seinni í vikuni.

Les eisini: Samgongan hevur tryggjað sær meirilutan fyri fíggjarlógini