Mette Frederiksen skal verða í Grønlandi til fríggjadagin

Mitt í øllum meldrinum um Grønland - við stórum amerikanskum áhuga, óvissu um framtíð landsins, stutt eftir at nýggj stjórn er skipað og dagin eftir kommunuval - lendir Mette Frederiksen seinni í dag í Nuuk.

Jesper Steinmetz, korrespondentur hjá TV2 í Nuuk, sigur, at man veit ikki so nógv um skránna hjá forsætismálaráðfrúnni í Grønlandi.

- Grønlendska stjórnin er vertur, so tað eru tey, sum skulu kunngerða skránna. Men tað hava tey ikki gjørt enn. Tað verður seinni í dag.

Greitt er tó, at í morgin skal Mette Frederiksen hitta nýggja landsstýrisformannin Jens Frederik-Nielsen, umframt hini floksforfólkini í stjórnuni. Hóskvøldið er døgurði á skránni. Einaferð fríggjadagin fer danski stjórnarleiðarin heim aftur.

Jens Frederik-Nielsen

Vitjar meðan Grønland er í miðdeplinum og rembingartíðir eru

Seinasta fríggjadagin vitjaði J.D. Vance, sum tann fyrsti amerikanski varaforsetin nakrantíð, Grønland. Hetta var tó bert á einari amerikanskari hernaðarmiðstøð. Hann og forsetin, Donald Trump, hava fleiri ferðir sagt, at Danmark ikki hevur tikið sær nógv væl av Grønlandi. Ynski hjá USA at yvirtaka Grønland á einhvønn hátt tykist sterkt og varð aftur endurtikið um vikuskifti.

Bæði Grønland og Danmark vísa hesum staðiliga aftur, men tað er eisini sligið fæst á hægsta politiska stigið í landinum, at nýhugsan í ríkisfelagsskapinum er neyðug.

Við nýggju stjørnini í Grønlandi, har bert Naleraq ikki er við, verður tað ikki ein so víðgongd sjálvstýrisleið, sum verður førd. Jens Frederik-Nielsen er nú landsstýrisformaður. Flokkur hansara Demokratiiet ynskir at gera tað stigvíst og hevur eisini havt fleiri puntkir um samstarv við danir.

Hjá teimum, sum taka avgerðir í Danmark, tykiskt als eingin áhugi vera fyri at sleppa takinum á Grønlandi nakað nevnivert. Tó eru orð sum betri samstarv og størri virðing nevnd.

Í mun til undanfarnu ferðinar, so skal Mette Frederiksen hesaferð mest samskifta við Jens Frederik-Nielsen og ikki Múte B. Egede. 33-ára gamli formaðurin í  Demokratiiet varð stóri vinnarin av valinum í síðsta mánaða og tók við eftir Egede, sum hevur verið rímiliga beinleiðis í sínum málburði mótvegis Danmark.