Mette lovar at lata samfelagið spakuliga uppaftur eftir páskir

Um tað ikki henda stórar broytingar, og danir standa saman um at halda fjarstøðu, og annars halda seg til tær ásetingar, sum eru settar í verk, so er møguleiki fyri, at danska samfelagið – spakuliga og stigvíst – kann latast upp aftur, tá páskini eru av.

Hetta lovaði Mette Frederiksen, danskur forsætisráðharri á tíðindafundi seinnapartin.

Sambært henni er tað av alstjórum týdningi, at danir ikki fara at slaka um krøvini. Um allir partar í samfelagnum halda seg til krøvini, so bendir alt í dag á, at møguleiki er spakuliga at lata samfelagið uppaftur eftir páskir.

Men tað verður spakuliga og stigvíst. Eitt nú við at spjaða virksemið, so sum undirvísing og arbeiði, út á alt samdørgið. Hetta við tí endamáli at forða fyri tysingartíðum í almennu ferðsluni.

Hetta merkir ikki, at Danmark er komið yvir tað ringasta. Fleiri fara at fáa smittuna, fleiri skulu leggjast inn á sjúkrahús og fleiri fara at doyggja, segði Mette Frederiksen.