Mick Jagger sjúkur: Rolling Stones útseta konsertferð

Læknar hava boðað Mick Jagger frá, at hann ikki er til reiðar at fara á konsertferð við bólki sínum næsta mánaða, skrivar TV2.

Tað er ikki greitt júst hvat tað er, sum bagir 75 ára gamla sangaranum í The Rolling Stones, men hann hevur fingið at vita, at hann ikki verður nóg frískur at fara á konsertferðina í Norðuramerika, sum skuldi byrja í Miami 20. apríl.

- Hann kann ikki fara á konsertferð í løtuni. Væntað verður, at hann kemur fyri seg fullkomiliga, so hann kann koma aftur á pallin skjótast gjørligt, stendur í skrivi frá bólkinum.

Á Twitter hevur Mick Jagger biðið um umbering, og lovar hann at arbeiða hart fyri at koma aftur á pallin skjótast gjørligt.

Konsertferðin skuldi byrja 20. apríl og enda 29. juni, men konsertferðin er nú útsett.

The Rolling Stones hava spælt tónleik saman í 57 ár, og er hetta ikki fyrstu ferð, at bólkurin hevur verið noyddur at útseta konsertir.

Í 2016 noyddist The Rolling Stones m.a. at útseta konsertir, tí Mick Jagger gjørdist sjúkur. Keith Richards hevur eisini verið orsøkin til, at bólkurin hevur verið noyddur at avlýsa fleiri konsertir.