Alda Nielsdóttir
Fráboðaði amerikanski grundtollurin á 10 prosent á útlendskar vørur, sum verða innfluttar til USA, komu í gildi í morgun, og 9. apríl kemur ein hægri tollur á vørur í ávísum londum eisini í gildi.
Les eisini: Trump leggur toll á vørur úr øðrum londum
Vandi er fyri, at tollurin fer at elva til hægri arbeiðsloysi og hægri prísvøkstur, sigur stjórin í amerikanska miðbankanum, Jerome Powell.
– Tað er nú við at gerast greitt, at tollurin verður munandi hægri enn væntað, sigur hann sambært Ritzau.
– Meðan tollurin helst fer at hava við sær eina fyribils príshækking, er tað eisini møguligt, at ávirkanin kann gerast varandi.
Nýggi tollurin hjá USA hevur havt við sær stórt fall á altjóða partabrævamarknaðunum, men tað fær ikki amerikanska forsetan, Donald Trump til at broyta sín politikk.
Trump sigur í dagføring á Truth Social, at hansara politikkur ongantíð fer at broytast, og heitir hann á Powell um at lækka rentuna.
– Lækka rentuna, Jerome, og steðga við at spæla politikk, sigur Trump.
Vinarliga broyt tínar kennifíla - og privatlívsstillingar fyri at síggja hetta innihald