Miðflokkurin: Norðurlandahúsið brúkt til heilavasking

Ein áheitan frá Miðflokkinum til foreldur og lærarar, nú Norðurlandahúsið hevur kunngjørt skúlasýningina "Ein kengura sum tú". Sýningin er til børn millum níggju og ellivu ár.

- Enn einaferð uppliva vit, at Norðurlandahúsið letur seg brúka at fremja miðvísa útlendska ávirkan á børn okkara. Hesuferð, sum so mangan, verður tað gjørt við at bjóða børnum og lærarum í húsið fyri at verða heilavaskaði av útlendingum, sum gjøgnum sjónleik, hesuferð bygdan á djóralív, royna teirra kynstur, skrivar Miðflokkurin.

- Miðflokkurin heitir inniliga á foreldur at verða vakin í hesum máli, at kanna tað, og serliga í komandi viku at verja børn tykkara móti hesari óføroysku og ókristiligu ávirkan. Somu áheitan senda vit lærarum og leiðslu fólkaskúlans, og biðja hesi um at seta seg inn í hetta virksemi Norðurlandahúsins og byrgja fyri tí óhepnu ávirkan, sum hetta virksemi kann hava sær á barnasálina.

Talan er um skúlasýningina "Ein kengura sum tú". Í fjør var mikið kjak um júst hendan leikin.