Miðflokkurin stillar ikki upp til fólkatingsvalið

Leiðslan í Miðflokkinum hevur í dag tikið avgerð um, at Miðflokkurin ikki fer at stilla upp til fólkatingsvalið.

Hesum boðar flokkurin frá í tíðindaskrivi í kvøld.

- Seinastu valini hevur flokkurin tikið aktivt lut í fólkatingsvalstríðum, men hóast greið ynski um at sleppa út um landoddarnar við politikki floksins má ásannast, at veljarin vil- og velur øðrvísi. Og onki bendir á, at útlitini fyri at aðrir enn teir fýra stóru flokkanir enn einaferð fara at dystast um fólkatingssessirnar, eru broytt.

- Miðflokkurin byrjaði longu fyri góðum ári síðani sínar fyrireikingar til Løgtingsvalið, og vit hava gjørt av heldur at miðsavna okkum enn meira um hesa alneyðugu uppgávuna. Aðalmálið er at venda samfelagskósini inn aftur á trygga grund og byggja upp tað, ið er farið fyri skeytið seinasta valskeiðið.

- Fyrsta stigið verður tí at fáa politisku skipanina, sum í løtuni er løgd í dvala, til lívs aftur sum skjótast, tí einki samfelag megnar at liggja óvirkið í mánaðir, bert tí flokkar ikki tora eitt løgtingsval.

Flokkurin heitir á løgmann um beinanvegin at skriva út løgtingsval.

- Eitt val sum, til fyrimun fyri øll, kundi verði sama dag sum fólkatingsvalið 6. juni, sigur Miðflokkurin.

Aksel V. Johannesen, løgmaður, sigur annars við Sosialin í kvøld, at val verður 31. august. Um okkurt serligt hendir, kann løgmaður vera noyddur at skriva út val fyrr, men í løtuni er einki, sum bendir á tað, skrivar Sosialurin.