Alda Nielsdóttir
Ísraelski forsætisráðharrin, Benjamin Netanyahu vitjar eftir ætlan í USA mánadagin, upplýsa ónevndar keldur fyri miðlinum Axios.
Amerikanski forsetin, Donald Trump boðaði hósdagin frá, at Netanyahu møguliga fór at vitja í Hvítu Húsunum í komandi viku.
Teir báðir tosaðu saman í telefon hósdagin, har málið um toll m.a. varð umrøtt. Hetta var meðan Netanyahu var á vitjan í Ungarn.
Fríggjadagin tosaði Netanyahu eisini við amerikanska uttanríkismálaráðharran, Marco Rubio, har málið um toll, eisini varð umrøtt.
Um Netanyahu kemur til USA mánadagin sum ætlað, verður hann fyrsti leiðarin, sum hittir Trump andlit til andlits fyri at samráðast við hann um toll.
Herfyri kunngjørdi Trump, at toll verður lagdur á innfluttar vørur úr øllum londum. Talan er um ein grundtoll á 10 prosent, men fyri ávís lond verður tollurin hægri. Eitt nú verður ein tollur á 17 prosent lagdur á vørur úr Ísrael. Enn er tó ikki greitt, hvørjar vørur talan er um.
Tollurin fer at raka ísraelska búskapin meint, av tí at USA er størsti handilsfelagi hjá Ísrael.
USA og Ísrael skrivaðu undir fríhandilsavtalu fyri 40 árum síðani, og eru tað í dag bert fáar vørur úr USA, sum eru álagdar toll í Ísrael. Týsdagin setti ísraelska stjórnin tiltøk í verk, sum hava til endamáls at gera allar amerikanskar vørur tollfríar, skrivar Reuters.
Umframt handil og toll verður kríggið í Gaza eisini á skránni, tá Netanyahu og Trump eftir ætlan hittast í Hvítu Húsunum mánadagin.
Vinarliga broyt tínar kennifíla - og privatlívsstillingar fyri at síggja hetta innihald