Nýggir føroyingar á føroyskum

Tveir nýggir flokkar av tilflytarum á Kvøldskúlanum hava nú tikið skeiðini “Føroyskt sum annaðmál”. Talan er um tveir flokkar, sum í gjár fingu váttan fyri at hava lokið framhaldsskeið, sum byggir á grundskeið, sum var síðsta heyst.

Átta næmingar eru í fyrsta flokki. Fleiri av hesum hava tikið styttri og longri víðarilestur á politekniskum skúlum og universitetum. Lærari er Alina Jespersen, sum sjálv er russisk av uppruna og bert hevur verið í Føroyum í tvey ár. Framhaldsskeiðið byggir á grundskeið, sum var síðsta heyst. 

Í øðrum flokki eru tólv næmingar, sum hava nakað av skúla og/ella handverksliga útbúgving - og næmingar, sum hava miðal langa og langa útbúgving. Lærari hevur verið Bergljót av Skarði. 

Myndirnar av ovurfegnu næmingunum vórðu tiknar í gjár, tá Jógvan Sørin Hansen, skúlastjóri á Kvøldskúlanum, handaði váttaninar. Skeiðið svarar til A1 støði í CEFR skipanini.

Næmingarnir hildu røður, sungu fleiri sangir og framførdu sjónleik um Páll Fanga - alt á klingandi føroyskum, skrivar Tórshavnar kommuna.