Nýtslan hjá drotningini minkað síðan Henrik prinsur fór

Meira enn trý ár eru liðin síðan Henrik prinsur, maður Margrethu drotning, andaðist, og at drotningin er vorðin einkja sæst eisini aftur á peninganýtsluni hjá henni.

Sambært uppgerð frá kongshúsinum, sum danska Se og Hør hevur fingið innlit í, sæst, at drotningin í fjør keypti fyri góðar 8,4 mió. krónur minni enn hon gjørdi í 2017, tá Henrik prinsur enn var á lívi.

Henrik prinsur andaðist 13. februar 2018.

Í 2017 brúkti parið tilsamans 35,8 mió. krónur til vørur og tænastur –starvsfólkalønir eru tó ikki íroknaðar. Í 2020 brúkti drotningin bert 27,4 mió. krónur.

Tær 8,4 mió., sum drotningin hevur spart, svara næstan til tær 8,5 mió. av apanasjuni hjá drotningini, sum vórðu eyðmerktar til Henrik prins.