Rubio: Grønlendingar ynskja ikki at vera partur av Danmark

Grønlendingar ynskja ikki at vera partur av Danmark, og tað er tað, sum Danmark eigur at savna seg um, sigur amerikanski uttanríkismálaráðharrin, Marco Rubio eftir at hava verið á fundi við uttanríkismálaráðharrar í Nato og eftir at hava tosað við danska uttanríkismálaráðharran, Lars Løkke Rasmussen.

Seinastu tíðina hevur amerikanski forsetin, Donald Trump ferð eftir ferð tosað um at taka ræði á Grønlandi, og danski uttanríkismálaráðharrin sigur, at hann gjørdi Rubio greitt, at USA má steðga við at koma við slíkum útsøgnum um Grønland.

Men sambært Rubio virða amerikanarar sjálvarvgerðarrættin hjá grønlendingum, og tað er ikki ætlanin hjá USA at taka Grønland uttanum Danmark og grønlendingar. Tað eru grønlendingar, sum ynskja at sleppa undan Danmark, sigur hann.

– Grønlendingar hava gjørt greitt, at teir ikki ynskja at vera partur av Danmark. Tað eigur Danmark at savna seg um. Vit hava ikki givið teimum hugskotið. Hetta hava teir tosað um leingi, sigur hann.

– Tá teir taka ta avgerðina, so gera teir tað.

– Tað, sum vit ikki vilja gera, er at lata Kina koma inn nú og bjóða teimum eina rúgvu av pengum, so teir gerast bundnir av Kina, sigur amerikanski uttanríkismálaráðharrin.

– Vit eru fólk, ikki fastogn
Grønlendski landsstýrisformaðurin, Jens-Frederik Nielsen sigur, at útsøgnirnar hjá Trump-umsitingini um Grønland eru tekin um vantandi virðing fyri grønlendska fólkinum.

– Vit eru fólk heruppi, vit eru ikki ein fastogn, sum mann kann keypa, sigur hann og leggur afturat, at tað altíð ber til at tosa um samstarv, men at tosa um at taka ræðið á einum øðrum landi kann ikki góðtakast.

Grønlendski fólkatingslimurin, Aaja Chemnitz skrivar soleiðis á X:

– Lat meg gera tað greitt: Eg vil heldur hava eitt tætt samstarv við Danmark enn við USA. Steðgið við at tosa, og byrjið at lurta eftir grønlendska fólkinum.