Russland hertikið tvær ukrainskar bygdir

Russiskar herdeildir hava hertikið tvær bygdir, Serebrjanka og Mykolajivka, í Donetsk-landslutinum har eysturi í Ukraina.

Tað skrivar russiska verjumálaráðið á boðtænastuni Telegram, sambært dr.dk.

Ukrainski herurin hevur ikki gjørt viðmerkingar til fráboðanina um, at tær báðar bygdirnar nú eru komnar undir russiskt vald. Men boðað er frá hørðum bardagum í økinum við eystara hermótið.

Blokkarar, sum viðgera kríggið í bæði Russlandi og Ukraina skriva um ógvusligt stríð við býin Selydove, sum liggur umleið 100 kilometrar í ein útsynning úr Mykolajivka.

Ukrainska herleiðslan sigur, at teirra fólk hava svarað aftur øll tey 12 russisku álopini, sum eru fram í økinum nærhendis Serebrjanka, skrivar dr.dk.