Skaðin var ikki stórur

Tað var ein sjálvtendrandi klútur, sum var orsøkin til, at eldur kyknaði í einari ruskspann nakað fyri klokkan sjey hósmorgunin, sigur vaktleiðarin á løgreglustøðini í Havn í morgun.

Ruskspannin stóð í einum bilhúsi á Ternuryggi í Havn.

Onkur hevði brúkt klútin at smyrja okkurt við og hevði síðani koyrt klútin í ruskspannina. Tað kann verða vandamikið, og eigur ein heldur á koyra klútin í eina spann av vatni, eftir at mann hevur smurt terassur og líknandi, minnir vaktleiðarin á.

Eldurin var skjótt sløktur, og skaðin var avmarkaður til ruskspannina.