Skúlin hjá Dugna við Áir liðugt umvældur

Arbeiðið at umvæla skúlan hjá Dugna við Áir er nú liðugt. Talan hevur í høvuðsheitum verið um ábøtur á luftviðurskiftir, innrætting og brunaviðurskiftir.

Í gjár var móttøka í skúlanum hjá Dugna við Áir í sambandi við at karmarnir, tey virka undir, nú eru liðugt umvældir.

Eftir at skúlaleiðarin, Stig Elttør, hevði bjóðað vælkomin og sagt frá skránni, fekk Eyðgunn Samuelsen, landssstýriskvinna við almannamálum, orðið. Hon segði millum annað:

- Tað gleðir meg, at arbeiðið at umvæla Dugnaskúlan og harvið at bøta um búeindina, undirvísingarhølini, eins og atkomuviðurskiftini, nú er at enda komið. Vónandi fer tað at lætta um gerandisdagin hjá næmingum og starvsfólki, at karmarnir eru blivnir betri. Vit vita, at trivnaður og fakligheit kunnu ikki skiljast sundur. Næmingar, sum trívast væl, læra eisini betur. Og fysiskir karmar hava sjálvandi eisini týdning, tá vit tosa um trivnað, segði Eyðgunn Samuelsen.

Síðani fekk leiðarin á Byggideildini hjá Landsverki, Jón O. Sólsker, orðið.

- Tá ið talan er um umbygging, kunnu nógvar avbjóðingar, ið tú ikki kennir frammanundan, koma óvart á. At bygt verður um í einum bygningi, ið er í brúki, og enntá í einum skúla, ger ikki avbjóðingarnar minni. Men hetta arbeiðið hevur gingið væl og er framt í góðum samstarvi millum partarnar. Vit gleðast um, at vit nú eru komin á mál, og eg fari at ynskja tykkum bestu eydnu, nú umvældi parturin av skúlanum verður tikin alment í nýtslu, segði Jón O. Sólsker.

Eisini Hedvig Johansdóttir, ið er stjóri fyri Dugna, bar fram eina heilsan.

- Fyri arbeiðið hjá okkum á Dugna hava karmar ein týðandi leiklut, tí teir eru við til at stuðla undir okkara arbeiði at stuðla tí einstaka næminginum ígjøgnum skúlagongdina og víðari út í eitt virki lív, segði stjórin millum annað, og nýtti eisini høvið at takka øllum pørtum fyri fyrimyndarligt samstarv.

Arbeiðið at umvæla skúlan varð boðið út í høvuðsarbeiðstøku, og lisitatión var í september 2018. Sáttmáli við JEP-Smíð varð eisini undirskrivaður í september 2018, og arbeiðið fór síðani í gongd beinanvegin.

Tað hava verið samanlagt trý byggistig. Byggistig 1 og 2 vóru gjørd í einum, og fevndu um útbygning, skúlastovu, køk, matarsalin í stovuhæddini, seks kømur og lærarastovuna á 2. hædd. Byggistig 3 fevndi um dagføring av einum undirvísingarhøli, kliva og samtalurúmi í stovuhæddini, umframt tvey kømur við vesi og vaskirúmi á 2. hædd. Fyri at gagnnýta jørðhitan, fingu dagførdu rúmini eisini gólvhita, umframt at bjálvað er millum hæddir og útveggir. Umvælingararbeiðið hevur gingið væl, og tíðar- og kostnaðarætlan hava hildið. Kostnaðurin av arbeiðinum hevur verið 4 milliónir krónur.

Tíðindaskriv frá Landsverki