Skulkidagur – ferðsluproppur í Marknagili

Okkurt bendir á, at glið nú aftur er komin í ferðsluna í Vesturbýnum í økinum kring Glasir í Marknagili.

Í mogrun høvdu næmingarnir, ið gerast lidnir í summar, árliga skulkidagin við skúlaársenda.

Vanliga plagdi tað at vera innkoyringin til Havnar á Hvítanesvegnum, sum varð rakt av hesum afturvendandi siði.

Nú eru næmingarnir fluttir út í Glasir, og hesaferð var tað Marknagilsvegurin, sum tað gekk útyvir.

- Orsaka av vegaarbeiði er nærum bara ein vegabreyt frammanundan, so tað skal ikki so nógv til at skapa ferðslupropp á staðnum, segði vakthavandi á politistøðini í morgun, sum eisini staðfesti, at tað hava verið nógv fólk, sum eru komin ov seint til arbeiðis í morgun.

Løgreglan sendi tveir patrúljuvognar til økið í eini roynd at fáa skil á ferðsluna, og nú um hálvgun nýggju tíðina, var komin nøkulunda glið á ferðsluna aftur, upplýsir løgreglan.