Uttanlands

Trump: Lond úr Miðeystri eiga at sleppa uppí Nato

Nato eigur at hava ein størri leiklut, tá tað kemur til at varðveita friðin í Miðeystri, heldur amerikanski forsetin

Mynd: EPA

Mynd: EPA

2020-01-10 08:10 Author image
Alda Nielsdóttir
placeholder

Amerikanski forsetin, Donald Trump heldur, at mann átti at víðka verjusamgonguna Nato (North Atlantic Treaty Organization) og loyva londum úr Miðeystri uppí.

Tað segði hann við tíðindafólk uttanfyri Hvítu Húsini í gjár.

Trump sigur einki um, hvørji lond úr Miðeystri, talan er um, men hann sigur seg longu hava funnið uppá eitt hóskandi navn til víðkaðu verjusamgonguna.

- Nato-ME (Middle East, red.). Eitt vakurt navn. Eg dugi væl við nøvnum.

Í dag eru 29 limalond í Nato, og undantikið Turkaland, eru øll limalondini úr Norðuramerika ella Evropa.

Við at geva Nato størri leiklut í Miðeystri kann USA, sambært Trump, minka um sína ávirkan og halda seg meira í bakgrundini, skrivar Ritzau.

- Og so kunnu vit koma heim – ella fyri tað mesta koma heim – og brúka Nato í staðin, sigur amerikanski forsetin um amerikonsku hermenninar í Miðeystri og stríðið ímóti IS.

Mikudagin segði Trump eisini, at Nato eigur at fáa ein størri leiklut í Miðeystri. Hetta segði hann, eftir at Iran leyp á tvær hernaðarstøðir í Irak, har amerikanskir hermenn hildu til. Eingin lat tó lív í álopinum, sum var aftursvarið hjá Iran fyri drápið á iranska generalin Qassem Soleimani.

Í samrøðu við Jens Stoltenberg, aðalskrivara hjá Nato, legði Trump eisini dent á týdningin av, at Nato fær ein størri leiklut í at varðveita friðin í Miðeystri, og gjørdust teir báðir samdir um, at Nato kann gera meira fyri at tryggja friðin í økinum og stríðast ímóti yvirgangi.

placeholder
placeholder