UEFA: Dómarar eiga at tora at steðga dystum

Fleiri dømi hava verið um rasismu í evropeiskum fótbólti higartil í ár. Nú ætlar forsetin í UEFA, Aleksander Ceferin, geva dómarunum meiri heimildir at steðga einum dysti grundað á rasismu.

Sum nú er skal rasisman verða “av stórari styrki og megi” áðrenn dysturin kann steðgast. Men Ceferin ynskir at gera tað lættari hjá dómarunum at steðga rasismuni.

- Vit mugu ikki verða bangin fyri at steðga dystum, um rasisma er tilstaðar. Í tí løtu ein dystur verður steðgaður ella ikki verður spældur, trúgvi eg, at 90 prosent av áskoðarunum á leikvøllinum fara at sparka býttlingarnar út, sigur Aleksander Ceferin.

Ceferin fer tí at heita á dómararnar at hava dirvi at steðga dystunum.