Uttanlands

USA: Freistin at selja TikTok útsett enn einaferð

Tað er neyðugt við meira arbeiði fyri at fáa eina avtalu í lag, sigur amerikanski forsetin – Sambært keldum er tað tollpolitikkurin hjá Trump, sum er forðingin

(Savnsmynd)

(Savnsmynd)

2025-04-05 18:56 Author image
Alda Nielsdóttir
placeholder

Amerikanski forsetin, Donald Trump hevur longt freistina fyri sølu av sosiala miðlinum TikTok, sum annars stendur til at verða bannað í USA.

Undir Joe Biden, samtykti amerikanska Kongressin at banna TikTok, um ikki Bytedance, sum er  móðirfelagið hjá TikTok, seldi sosiala miðilin áðrenn 19. januar. Hetta hevði við sær, at um 170 milliónir amerikanarar mistu atgongd til TikTok í nakrar tímar. 

Freistin hjá ByteDance, sum er stovnað í Kina, at selja TikTok varð longd í januar, og nú boðar Trump frá, at hon er longd enn einaferð við 75 døgum.

Trump skrivar á Truth Social, at umsiting hansara hevur arbeitt hart fyri at fáa eina avtalu í lag, og er neyðugt við meira arbeiði fyri at tryggja neyðugar góðkenningar.

– Vit vilja ikki hava, at TikTok fer í svart, sigur hann.

Í fráboðan frá ByteDance verður sagt, at har framvegis eru "lyklaspurningar", sum skulu loysast fyri at sleppa undan einum forboði í USA.

Trump greiðir ikki nærri frá, hví tað ikki er eydnast at gera eina avtalu, men hann nevnir, at tey í Kina eru ónøgd við tollin, sum Trump legði fram fyrr í vikuni. Tvær ónevndar keldur siga við tíðindastovuna Reuters, at tað er júst tollurin hjá Trump, sum er forðingin.

Bæði núverandi og nýggir íleggjarar, umframt ByteDance og amerikanska stjórnin høvdu givið grønt ljós, og avtalan var næstan klár mikudagin, tá Trump boðaði frá tollinum, sigur ein kelda.

Um forboðið kemur í gildi, verður tað framvegis loyvt at hava TikTok á telefonini í USA, men veitarar kunnu fáa stóra bót, um teir loyva nýggjum brúkarum at taka appina niður.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder