- Einki hol á nakrari alinót

Nú tíðindainnslag var í Degi og Viku í gjár um alifisk sum var deyður í ánni í Leynum, gjørdi Bakkafrost skjótt av.

- Vit hava staðfest at einki hol er á nakrari nót, sigur Regin Jacobsen, stjóri á Bakkafrost í skrivi til miðlarnar.

Kavarar hava verið í dag og eftirkanna allar alinótirnar hjá Bakkafrost kring alt landið, og har var einki hol at finna.

- Allar nótir verða eftirhugdar regluliga fyri at eftirkanna at einki hol er, og at alt er sum tað skal vera. Vit hava ikki varnast nakað óregluligt í ár.

Bakkafrost fráboðar illgruna um slopnan fisk til myndugleikarnar umframt at tey rapportera slopnan fisk í teirra sustainability rapport – Sunt lív. Henda er tøk á heimasíðuni hjá Bakkafrost.

Í rapportini sæst á blaðsíðu 21 frágreiðing um umstøður ísamband við at fiskur kann sleppa, og hvussu Bakkafrost ansar eftir hesum.

Regin Jacobsen upplýsir, at í 2015 og 2016 slapp eingin laksur hjá Bakkafrost, men tíverri var størsta óhappi hjá Bakkafrosti nakrantíð í storminum 29. November 2017, tá tey mistu allan fiskin í einum ringi á Gulanum.