- Tað ljóðaði eitt buldur og øll vindeyguni fóru í smildur

Umframt seks deyð hava eisini 16 fólk fingið skaða í tokinum, sum varð rakt av lutum frá einum øðrum toki á Stórabelti í morgun.

Ein teirra, sum upplivdi hendingina var Heidi Langberg Zumbusch, sum júst var komin upp í tokið í Nyborg, tá vanlukkan hendi.

Danmarks Radio hevur tosað við hana, og hon greiðir frá, at tað ljóðaði eitt buldur og so smildraðust vindeyguni. Ferðafólkini slongdust niður í dúrkið áðrenn tokið støðgaði heilt upp. Hon sá ikki, hvat orsøkin var til hendingina, bara at onnur síðan á tokinum skrædnaði.

- Vit vóru heppin. Tey, ið sótu í vogninum frammanfyri, vóru ikki so heppin, sigur Heidi Langberg Zumbuch, sum ikki fekk nakran skaða, men er skelkað av hendingini.

Ferðafólkini vórðu øll savnað í aftasta vogninum og síðan flutt á eina hjálparmiðstøð, sum varð skipað í Nyborg.

Orsøkin til vanlukkuna var, at takið feyk av einum farmatoki lastað við øli og fleyg inn í ferðafólkatokið.

Bryggjaríið Carlsberg hevur váttað fyri TV2, at tað vóru togvognar við góðsi frá Carlsberg, ið vóru orsøk til vanlukkuna.