48 dripin av sjálvmorðsbumbu í Kabul

Í minsta lagið 48 fólk vóru í gjár dripin, tá ein sjálvmorðsbumba varð sprongd í Kabul í Afganistan í gjár.

Talsmaður fyri heilsumálaráðið í Afganistan sigur, at álopið varð framt á ein útbúgvingarstovn. Talsmaðurin segði fyri CNN, at umframt tey 48 dripnu, vóru í minsta lagið 67 fólk særd.

Ikki er vist hvør stóð aftanfyri sjálvmorðsbumbuálopið. Tó eru Taliban sera aktivir í Afganistan í hesum døgum. Teir berjast eitt nú í býnum Ghazni í suðurpartinum av landinum. Bardagarnir har verða kallaðir teir harðast millum Taliban og myndugleikarnir seinastu trý árini.