6 mió. kr. meiri í inntøku enn væntað

Á býráðsfundinum týskvøldið 7. august 2018 varð roknskapurin hjá Vágs kommunu fyri árið 2017 viðgjørdur og samtykur.

Inntøkurnar hjá Vágs kommunu í 2017 vóru 63,9 mió. kr., sum er á vet hægri enn í 2016, tá inntøkurnar vóru 63,0 mió. kr. Í uppruna fíggjarætlanini fyri 2017 var annars mett, at Vágs kommunu fóru at hava inntøkur á smáar 58 mió. kr., og er tað at fegnast um, at inntøkurnar vóru umleið 6 mió. kr. hægri enn mett varð í fíggjarætlanini, skrivar Vágs kommuna á heimasíðu síni.

Vágs kommuna gjørdi í 2017 íløgur fyri umleið 7,9 mió. kr. Íløgurnar fevndi m.a. um íløgur á ítróttarøkinum á Eiðinum, dagstovnaøkinum, og í nýggj hølir til Musikkskúlan. Harumframt varð í 2017 eisini hildið áfram við miðvísu nýgerðini og dagføringini av Heilsumiðstøðini. Í 2017 vórðu eisini gjørdar asfalteringar kring um í kommununi, dagføringar á havnarlagnum og av gøtuljósunum. Harumframt vórðu eisini gjørdar nýíløgur í bæði vatnveitingina og á spillvatnsøkinum.

Vanligi raksturin kostaði umleið 51,5 mió. kr. hetta er 0,8 mió. kr. ella 1,5% lægri enn í 2016, tá raksturin kostaði 52,3 mió. kr.

Umframt kommunala raksturin, so er Vágs kommuna partur av fleiri millum kommunalum samstørvum í Suðuroynni, har Bú- og Heimatænastan í Suðuroy (samstarvið um eldraøkið) er tað størsta. Í 2017 vóru útreiðslurnar hjá Vágs kommunu av eldrarøkinum í Suðuroynni 14,9 mió. kr.

Úrslitið av rakstrinum hjá Vágs Kommunu, sokallaða RLÚ, í 2017 var eitt avlop á 0,7 mió. kr.

Í 2017 rindaði Vágs kommuna smáar 2,4 mió. kr. til afturgjald av lánum. Við árslok 2017 var nettoskuldin hjá Vágs kommunu smáar 33,8 mió. kr., sum svarar til umleið 0,73 álíkning.