Ukraina: Ætlaðu at drepa Zelenskyj

Ukrainska trygdartænastan SBU sigur seg hava handtikið fleiri fólk, sum verða hildnir at vera agentar hjá russisku fregnartænastuni FSB, sum høvdu til uppgávu at beina fyri Volodymyr Zelenskyj, forseta í Ukraina og øðrum embætisfólkum.

Zelenskyj er á einum lista yvir persónar, sum myndugleikarnir í Russlandi ynskja at handtaka. Hvat tey ynskja at handtaka hann fyri, er ikki greitt, skrivar Ritzau.

Ukraina hevur fleiri ferðir ávarað um, at ætlanir vóru um at beina fyri Zelenskyj. Í 2022 vóru m.a. fráboðanir um, at fólk úr Wagner-bólkinum høvdu fingið boð um at drepa ukrainska forsetan.

Síðan kríggið í Ukraina byrjaði, hevur Zelenskyj verið staddur í Ukraina meginpartin av tíðini. Hann hevur tó eisini vitjað í m.a. Washington D.C. og Keypmannahavn.