Uttanlands

Albania vil lata mørkini upp aftur

Í Albania eru bert fimm tilburðir staðfestir seinasta samdøgrið, og eingin er deyður av korona seinastu tríggjar vikurnar

Fyri góðari viku síðani byrjaði albanska stjórnin varisliga at lata samfelagið uppaftur (Mynd: EPA)

Fyri góðari viku síðani byrjaði albanska stjórnin varisliga at lata samfelagið uppaftur (Mynd: EPA)

2020-05-21 18:04 Author image
Alda Nielsdóttir
placeholder

Hendan mánaðin fer Albania at lata mørkini uppaftur og fyrireika seg uppá at taka ímóti ferðafólkum aftur, sigur Edi Rama, forsætisráðharri, eftir at eingi koronaandlát eru skrásett í landinum seinastu tríggjar vikurnar.

Ferðavinnan hevur verið sera hart rakt av koronakreppuni, men nú verður farið í holt við at fyreika upplatingina, og tað verður í mai, sigur forsætisráðharrin við albanska tingið.

– Um vit fáa eina bylgju afturat, fer hon at verða nógv ógvusligari enn tann fyrra, og fara vit at handfara hana eins og vit gjørdu hina, sigur Edi Rama sambært Reuters.

Albania hevur útfaringarforboð um næturnar, fólk sleppa enn ikki at savnast í ov stórum mannamúgvum, og summi "reyð" øki, eitt nú høvuðsstaðurin Tirana, eru stongd.

Seinasta samdøgrið eru fimm nýggir tilburðir staðfestir. Í løtuni eru 167 fólk smittað tilsamans. Samlaða talið á skrásettum tilburðum í landinum er 969, og samlaða talið á andlátum er 31. 14 fólk eru innløgd, harav trý á intensivari deild.

placeholder
placeholder