Uttanlands

Danir fara skjótt at kunngerða talið av frískum

Higartil er bert ein persónur staðfestur frískur í Danmark, sambært almennu hagtølunum. Talan er um tann fyrsta, ið fekk staðfest koronasmittuna í landinum

Statens Serum Institut hevur ikki fingist við at staðfesta, hvussu nógv eru vorðin frísk - hetta er ein trupul tilgongd í Danmark - men nú er ein nýggj algoritma bygd upp. Tølini ið Johns Hopkins University í USA hevur fyri frísk í Danmark eru helst fyri Føroyar í størsta mun

2020-04-01 10:27

Agnar Prestá

Í Føroyum verða tølini fyri tey, sum eru vorðin frísk eftir at hava havt koronavirus, hvønn dag kunngjørd.

Í Danmark er almenna talið av frískum ein. Næstan 3.000 persónar hava fingið staðfest covid-19, og ein av hesum er lýstur frískur. Talan er um Jakob Tage Ramlyng, ið var tann fyrsti danin ið fekk staðfest smittuna. TV-2 journalisturin hevði verið á skíferiu í Norðuritalia, og 27. mars var greitt, at koronavirusið var komið til Danmarkar - eina viku seinni varð staðfest, at Ramlyng var frískur, og at hansara sóttarhald var liðugt.

Síðani tá er smittutalið voksið nógv í Danamark. Eisini eru nógv innløgd og hava tørv á inntensivari viðgerð og respiratori. 90 staðfestir deyðstilburðir eru í Danmark av fólki við koronavirusinum. Tyra Grove Krause frá Statens Serum Institut sigur við DRl, at tað er ikki vanligt, at gera slík tøl upp, men at tey tó helst verða til reiðar tíðliga í hesum mánaðinum.

Tað er heldur trupult at fáa veruligt yvirlit, tí tey flestu av teimum, ið hava fingið staðfest virusið, verða ikki innløgd. Harvið verða tey heldur ikki útskrivað og automatiskt skrásett.

Landið og talið tilburðirnir eru nógv størri enn í Føroyum, og tí er tað ikki møguligt at á sama hátt fylgja við.

Tyra Grove Krause sigur, at tey hava verið noydd til at byggja eina algoritmu upp frá botninum. Tað verður arbeitt eftir tí, at um ein hvørki er innlagdur ella deyður tvær vikur eftir at hava fingið staðfest smittuna, so er ein frískur.

DR skrivar, at meðan Statens Serum Institut hevur arbeitt uppá algoritmuna, so hevur Johns Hopkins University í USA givið sítt boð uppá talið. Tað er ein av stovununum (síðunum) ið fylgir koronatølunum kring heimin neyvt, og á útfyri yvir fólk, sum eru vorðin frísk í Danmark, stendur ikki 1, men 77.

Á Statens Serum Institut kenna tey einki til hetta talið, og DR hevur spurt Johns Hopkins University um hetta, men hevur einki svar fingið.

Tað er væl hugsandi, at Føroyar og Grønland verða roknaði uppí Danmark í hesum førinum. Í Føroyum vóru 74 staðfest frísk í gjár. Undir samlaðu smittaðum stendur Danmark við beint yvir 3.000 hjá Johns Hopkins University - beint undir 300 fleiri enn danska talið frá í gjár. Í flestu altjóða uppteljingunum av hagtølunum verða Føroyar bólkaðar saman við Danmark.

Les eisini: Danska stjórnin kann nú bannað fólkum at savnast

Vinarliga broyt tínar kennifíla - og privatlívsstillingar fyri at síggja hetta innihald