Er skuldsettur fyri at sláa Mette Frederiksen

Tíðliga í juni varð forsætisráðfrú Mette Frederiksen fyri einum slagi av álopi á gøtuni í Keypmannahavn - við Kultorvet.

Nú er ein 39-ára gamal maður skuldsettur fyri harðskap. Hetta skriva tíðindastovan Ritzau og danskir miðlar seinnapartin. 

Í ákæruni stendur, at talan er eitt slag við knýttum neva á høgru øksl hjá Mette Frederiksen. Hetta er brot á  §119 í revsilógini - álop á ein tænastumann.

Maðurin noktar seg sekan. Talan er um ein pólskan ríkisborgara, sum kann verða útvístur úr Danmark. 

Hetta verður greitt eftir rættarfundirnir. Teir verða 6. og 7. august.