Eyðstein Zachariassen verður borgarstjóri í Sunda kommunu

Semja er gjørd um skipan av komandi býráði í Sunda kommunu.

Listi C fekk reinan meiriluta á valinum við sjey valdum umboðum, meðan listi B – Kvinnulistin – fekk fýra umboð.

Men tað er ikki listi C, sum skipar komandi meirilutan í Sunda kommunu.

Á valinum hendi tað, at borgarstjórin, Jógvan Kruse einans fekk atkvøður nokk til at enda nummar trý á listanum, og gjørdist harvið fjórvaldi býráðslimurin.

Toppskorari gjørdist Eyðstein Zachariassen  við 168 persónligum atkvøðum, 69 fleiri enn sitandi borgarstjóri, og hann gjørdi greitt longu á valkvøldinum, at hann fer eftir borgarstjórasessinum.

Nú er listin so farin í tvíningar. Tí semjan, ið varð undirskrivað í gjár varð gjørd millum fær fýra á kvinnulistanum og trý av teimum valdu á lista C, og semjan ber eisini í sær, at Eyðstein Zachariassen verður borgarstjóri.

Enn hevur nýggja býráðið ikki verið savnað til at skipa seg. Tað hendir fyrsta dagin, sigur Eyðstein Zachariassen í samrøðu við Kringvarpið.

Hesi manna komandi býráðið í Sunda kommunu:

Listi C 709 atkvøður:
Eyðstein Zachariassen 168
Marni Eyðolvsson Joensen 158
Jógvan Kruse 99
Hallgerð Hansen 75
Haraldur Símunarson Hammer 53
Rógvi Nybo 43
Trygvi Kallsoy 37

Listi B 439 atkvøður:
Jóhanna Paula við Streym 128
Lena Dam 82
Rakul Martinsdóttir Johansen 47
Ingibjørg Egholm 44

Eyðstein Zachariassen, sum verður borgarstjóri, stillaði upp fyri Fólkaflokkin á løgtingsvalinum í 2022. Hann gjørdist nummar 14 á listanum við 162 persónligum atkvøðum.