Fekk leyst lív eftir at hava fingið skeljadjór á føroyskari matstovu

Alt bendir á, at tað í framtíðini verður trupult at fáa føroysk skeljadjór borðreidd á føroyskum matstovum. Eftir eina fráboðan frá Heilsufrøðiligu Starvsstovuni, eru smáar vónir um, at tað verður møguligt at borðreiða við øðu, kræklingi og øðrum leskiligum skeljadjórum úr føroyskum sjógvi í framtíðini.

Matstovurnar hava hug at himprast og undrast yvir, hví slíkt skal verða álagt teimum. Tey eru ikki vitandi, at nakar í Føroyum hevur fingið trupulleika av at eta skeljadjór. Tær siga, at avleiðingin helst verður, at tær ikki longur kunnu borðreiða við føroyskum skeljadjórum.

Heilsufrøðiliga Starvsstovan hinvegin tekur málið í fullum álvara. Hetta snýr seg um at kunna veita trygd fyri, at gestirnir á matstovunum ikki skulu vera í vanda fyri at eta eitrandi mat.

- Vit hava fingið onkrar fráboðanir frá fólki, sum siga seg hava fingið leyst lív eftir at hava fingið skeljadjór á matstovu, sigur Bjørg Mikkelsen á matvørudeildini hjá Heilsufrøðiligu Starvsstovuni.

- Nú er leyst lív ikki so álvarsligt, men vit vita, at alguvøkstur í skeljadjórum kann vera sera eitrandi. Kann vera beinleiðis oyðileggjandi fyri nervalagið hjá fólki, so tey í ringasta føri kunnu gerast lamin, ella missa vitið. Tað er tí, at vit seta hesi krøvini, greiðir Bjørg Mikkelsen frá.

Øll greinin kann lesast ókeypis í Blaðnum Vikuskifti her