Forsetaval í Sýria í mai

Í mai verður forsetaval í Sýria, boðar formaðurin fyri landsins tjóðarting frá.

Seinastu tíggju árini hevur Sýria verið merkt av borgarakríggi, og helst verður vinnarin av komandi forsetavalinum eisini núverandi forsetin, Bashar al-Assad, skrivar Ritzau.

Boðað verður frá, at sýrar í útlondum kunnu atkvøða á sendistovum, og mánadagin kunnu møgulig valevni søkja um at koma við á atkvøðuseðilin.

Bashar al-Assad kom til valdið í ár 2000, eftir at pápi hansara, Hafez al-Assad doyði. Hann hevur tó enn ikki boðað frá uppstilling til valið.

Seinast val var í Sýria var í 2014. Á valinum, sum varð hildið undir brogarakrígnum, vann Assad við 88 prosent av atkvøðunum.

Sambært sýrisku stjórnarskipanini, kann ein forseti bert sita í tveimum sjey-ára skeiðum. Tó er undantak gjørt fyri valið í 2014.

Altjóða mannarættindafelagsskapir lýsa Sýria sum eitt land við einræði.

Valið í Sýria skal eftir ætlan vera 26. mai.