Gekk seg fastan á Háfjalli

Í sambandi við Summar Festivalin hava nógv fólk verið í Klaksvík um vikuskiftið, men hetta hevur løgreglan ikki merkt nógv til.

Tíðliga í morgun fekk løgreglan tó eina fráboðan um, at ein persónur var farin ein túr upp á Háfjall.

Sambært løgregluni, eydnaðist tað tó ikki persóninum, sum hvørki hevði línu ella aðra klintriútgerð, at koma upp á fjallið, men viðkomandi hevði gingið seg fastan rættiliga ovarlaga á fjallinum.

Tí vórðu boð send eftir Norðoya Bjargingarfelag, ið sendu fólk niðan at hjálpa viðkomandi oman aftur av fjallinum.

Sambært vaktleiðaranum á politistøðini komu øll av fjallinum aftur í øllum góðum.